جدہ: سعودی عرب کے ایک شہر کو دُنیا کے سات عجوبوں میں شامل کرلیا گیا، سعودی عرب کے شمال میں واقع ثقافتی شہر العلا کو 2023 کے دنیا کے سات عجائب میں شامل کرلیا گیا۔
تاریخی اور ثقافتی ورثہ ہونے کے باوجود کچھ عرصہ پہلے تک اس جگہ کے متعلق جزیرہ نما عرب سے باہر بہت کم لوگ جانتے تھے یا بہت کم لوگون نے اس جگہ کو دیکھ رکھا تھا۔
2023 کے عجائب کی فہرست مرتب کرنے والے ایوارڈ یافتہ سفرنامہ نگار آرون مِلر کے مطابق جب 2022 کے آخر میں اس جگہ کو سرکاری طور پر سیاحوں کے لیے کھولا گیا تو عرب کی 2 لاکھ برس پُرانی تاریخ سامنے آئی۔
العلا سعودی عرب کے شمال مغربی صحرا میں واقع ہے، جس کا زیادہ تر حصہ ابھی بھی غیر دریافت شدہ ہے۔ ایک اندازے کے مطابق اس علاقے کے صرف 5 فیصد حصے کی کھدائی کی گئی ہے۔
یونیسکو ورلڈ ہیریٹیج قرار دیے گئے مقام الحجر چٹانوں کو کاٹ کر بنائے جانے والے مقبروں کی وجہ سے مشہور ہے۔
العلا کے ساتھ آرون مِلر نے فرانس کے مونٹ سینٹ مائیکل، ارجنٹائن کے پیریٹو مورینو گلیشیئر، بھوٹان کے ٹائیگرز نیسٹ مونیسٹری، ترکیہ کے کیپاڈوچیا، برطانوی لیک ڈسٹرکٹ اور جنوبی افریقا کی سارڈائن رن کو 2023 کے سات عجائب کی فہرست میں شامل کیا۔
