اسٹاک مارکیٹ میں تیزی، امریکی ڈالر سستا ہوگیا

کراچی: پاکستان بھر میں روپے کے مقابلے میں امریکی ڈالر سستا ہوگیا جب کہ پاکستان اسٹاک مارکیٹ میں اُتار چڑھاؤ کے بعد 91.93 پوائنٹس کی تیزی ریکارڈ کی گئی۔
پاکستان اسٹاک مارکیٹ میں اُتار چڑھاؤ کے بعد 91.93 پوائنٹس کی تیزی ریکارڈ کی گئی اور 100 انڈیکس 44 ہزار 266 پوائنٹس کی سطح پر پہنچ کر بند ہوا، پورے کاروباری روز کے دوران کاروبار میں 0.21 فیصد کی بہتری دیکھی گئی جب کہ 8 کروڑ 46 لاکھ 35 ہزار 555 شیئرز کا لین دین ہوا جس کے باعث سرمایہ کاروں کو 10 ارب روپے سے زائد کا فائدہ ہوا۔
دوسری جانب اسٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے چوتھے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں 3 پیسے کی کمی ریکارڈ کی گئی اور قیمت 178 روپے 15 پیسے سے کم ہوکر 178 روپے 12 پیسے ہوگئی۔