لاہور: پاکستانی طالبہ زارا نعیم نے ایسوسی ایشن آف چارٹرڈ سرٹیفائیڈ اکاؤنٹنٹس (اے سی سی اے) کے امتحان میں دنیا بھر میں سب سے زیادہ نمبرز حاصل کرنے والی طالبہ کا اعزاز حاصل کرلیا۔
نجی ٹی وی سے گفتگو کرتے ہوئے پاکستانی طالبہ زارا نعیم نے کہا کہ سخت امتحان کے لیے ’مطالعے پر توجہ مرکوز کرنا‘ پہلی ضرورت ہے۔
لاہور سے تعلق رکھنے والی زارا نعیم کا کہنا تھا کہ پڑھائی کا مجھے ہیمیشہ سے شوق تھا، اگرچہ اے سی سی اے آسان نہیں لیکن اگر آپ تہیہ کرلیں اور محنت کریں تو آپ کرسکتے ہیں۔
انہوں نے بتایا کہ مجھے اے سی سی اے کی فنانشل رپورٹنگ میں نمایاں مقام حاصل کرنے میں 2 سال کا عرصہ لگا، اے سی سی اے کی کوئی خاص کلاسز نہیں لیں بس سخت محنت کے ذریعے عالمی سطح پر پاکستان کا نام روشن کرنے میں کامیاب رہی۔
واضح رہے کہ زارا نعیم کو دسمبر 2020 میں منعقد کیے جانے والے اے سی سی اے امتحان میں سب سے زیادہ نمبر حاصل کرنے کے بعد عالمی انعام یافتہ (global prizewinner)قرار دیا گیا ہے۔
