کراچی: عدالت عالیہ سندھ نے نقیب اللہ قتل کیس میں سابق ایس ایس پی ملیر راؤ انوار کی حاضری سے استثنیٰ کی درخواست خارج کردی۔
چیف جسٹس سندھ ہائی کورٹ جسٹس احمد علی شیخ کی سربراہی میں 2 رکنی بینچ کے روبرو نقیب اللہ قتل کیس میں سابق ایس ایس پی ملیر راؤ انوار کی حاضری سے استثنیٰ کی درخواست پر سماعت ہوئی۔
عدالت نے سابق ایس ایس پی ملیر راؤ انوار کی حاضری سے استثنیٰ کی درخواست خارج کردی۔ چیف جسٹس نے ریمارکس دیے آپ یہ بتائیں، آپ کو ہی حاضری سے استثنیٰ دے دیں۔ کیا یہ دوسروں سے امتیازی سلوک نہیں ہوگا۔
راؤ انوار کے وکیل عامر منسوب ایڈووکیٹ نے موقف اختیار کیا کہ حساس اداروں نے راؤ انوار کی سیکیورٹی سے متعلق رپورٹ دی ہے۔ میرے موکل کو سخت سیکیورٹی خدشات ہیں۔
چیف جسٹس احمد علی شیخ نے ریمارکس دیے ٹرائل کورٹ کو روز کی بنیاد پر سماعت کی ہدایت دے دیتے ہیں۔ آپ کی اس درخواست کو مسترد کرتے ہیں۔ جس پر عامر منسوب نے استدعا کی عدالت درخواست مسترد نہ کرے، ہم واپس لے لیتے ہیں۔ عدالت نے استدعا منظور کرلی اور درخواست واپس لینے کی بنیاد پر خارج کردی۔
واضح رہے کہ سابق ایس ایس پی ملیر راؤ انوار نے ٹرائل کورٹ سے حاضری سے استثنیٰ کی درخواست دائر کی تھی۔ ٹرائل کورٹ راؤ انوار کی حاضری سے استثنیٰ کی درخواست پہلے ہی مسترد کرچکی۔ راؤ انوار کو ٹرائل کورٹ کے فیصلے کو سندھ ہائی کورٹ میں چیلنج کیا تھا۔
