اسلام آباد میں پی ٹی آئی سیکریٹریٹ پر چھاپہ، رئوف حسن گرفتار
![](https://urdu.voiceofsindh.com.pk/wp-content/uploads/2024/07/Rauf-Arrest.jpg)
اسلام آباد: پولیس کا پی ٹی آئی سیکریٹریٹ پر چھاپہ، پی ٹی آئی کے سیکریٹری اطلاعات رؤف حسن گرفتار۔
اسلام آباد پولیس کے مطابق پی ٹی آئی سیکریٹریٹ میں قائم ڈیجیٹل میڈیا سیل کے مرکزی دفترپر چھاپہ مارا گیا، قانون نافذ کرنے والے اداروں نے شواہد کی بنیاد پر چھاپہ مارا۔
پولیس کا بتانا ہے کہ پی ٹی آئی کا ڈیجیٹل میڈیا مرکز انٹرنیشنل ڈس انفارمیشن کا مرکز بنا ہوا تھا اور پوری دنیا میں پاکستان مخالف پروپیگنڈا یہاں سے کروایا جاتا تھا، ڈیجیٹل میڈیا سیل سے پاکستان مخالف اور ملکی سالمیت کے خلاف پروپیگنڈا بھی چلایا جاتا تھا۔
پولیس کے مطابق پاکستان مخالف پروپیگنڈے میں براہِ راست ملوث لوگوں کو گرفتار کیا گیا ہے، پی ٹی آئی ڈیجیٹل میڈیا سیل سے تمام ثبوت تحویل میں لے لیے گئے، رؤف حسن کی نگرانی میں ڈیجیٹل میڈیا سیل چلایا جارہا تھا، جس کے بعد رؤف حسن کو بھی گرفتار کیا گیا ہے۔
اس سے قبل پی ٹی آئی نے رؤف حسن کے ساتھ بیرسٹر گوہر کی بھی گرفتاری کا دعویٰ کیا تھا، تاہم اسلام آباد پولیس نے بیرسٹر گوہر اور خواتین کی گرفتاری کی تردید کردی ہے۔
پی ٹی آئی کا کہنا ہے کہ پولیس نے سیکریٹریٹ سے کمپیوٹر سمیت دیگر سامان بھی ضبط کرلیا ہے۔