اسلام آباد: عالمی ادارہ صحت کے نمائندے ڈاکٹر پلیتھا ماہی پالا نے ورلڈ سیفٹی ڈے پر پریس بریفنگ میں کہا ہے کہ آج پاکستان نے کووڈ 19 پر قابو پالیا ہے اور اس حوالے سے پاکستان قابل تعریف ہے۔
اسلام آباد میں نیوز کانفرنس کرتے ہوئے ڈبلیو ایچ او کے نمائندے ڈاکٹر پلیتھا ماہی نے بتایا کہ آج کا دن بہت اہم ہے، ہیلتھ ورکرز محفوظ ہوں گے تو مریض محفوظ رہیں گے، کورونا صورت حال میں ہمارے ہیلتھ ورکرز نے مثالی کردار ادا کیا۔
ڈاکٹر پلیتھا ماہی نے کہا کہ پاکستان دنیا کے 7 ممالک میں سے ہے جس نے وبا پر قابو پالیا، اگرچہ اسکول کھلنے سے مشکلات کا سامنا ہے، تاہم ہم طبی عملے اور ٹیچرز کو ٹریننگ دے رہے ہیں تاکہ آگاہی پھیلا سکیں، وزارت صحت، ڈبلیو ایچ او اور تمام ادارے مل کر کام کررہے ہیں۔
اس موقع پر پمز کے ایگزیکٹو ڈائریکٹر ڈاکٹر انصر نے کہا کہ چین سے کورونا وبا شروع ہوئی تو پاکستان میں اسے روکنے کےلیے ہر ممکن اقدامات کیے گئے، پاکستان نے اس چیلنج کا سامنا کیا، ہمارے ملک میں وبا اس طرح اثر انداز نہیں ہوئی جیسے دیگر ممالک میں ہوئی۔
انہوں نے مزید کہا کہ پمز ہسپتال نے ہمیشہ کوشش کی کہ ہر حالت میں لوگوں کو سہولتیں دی جائیں، ڈبلیو ایچ او کے کردار کو سراہتے ہیں کہ انہوں نے اہم کرادار ادا کیا۔
