اسلام آباد: پاکستان کی جانب سے ایئر شو میں جدید ترین کثیرالجہتی کردار کا حامل طیارہ متعارف کروایا گیا ہے، طیارہ قراقرم ایٹ این جی پاکستان ایروناٹیکل کمپلیکس کامرہ کی تخلیق ہے۔
ذرائع کے مطابق قراقرم ایٹ نیکسٹ جنریشن طیارہ، قراقرم ایٹ جیٹ تربیتی طیارے کی جدید شکل ہے، طیارہ اہداف کے تعین، نگرانی، زمینی اہداف کی تباہی میں کارگر ہے، قراقرم ایٹ نیکسٹ جنریشن طیارہ 4.6 ٹن وزن ساتھ لے جاسکتا ہے۔
ذرائع کا کہنا ہے کہ جہاز پر محدود فاصلے تک فضا سے فضا میں داغنے کے لیے میزائل نصب ہوسکتے ہیں، طیارے پر گنز، راکٹ لانچر، لیزر گائیڈڈ بم بھی نصب کیے جاسکتے ہیں، طیارہ ہدف کو لاک کرنے، جیمنگ کی صلاحیت رکھتا ہے، جہاز 840 کلومیٹر فی گھنٹہ کی رفتار، 12 ہزار میٹر بلندی تک جاسکتا ہے، جدید ایوی آنکس، ہتھیاروں کی تنصیب سے طیارہ تربیتی اور آپریشنل امور دونوں میں کارگر ہے۔
ذرائع کے مطابق جہاز کم قیمت، مرمت آسان، جدید ٹیکنالوجی سے لیس اور کارکردگی میں بہترین ہے، پاکستان ایروناٹیکل کمپلیکس کامرہ کا تربیتی طیارہ سپر مشاق بھی ایئر شو کا حصہ ہے۔ دبئی ایئر شو 14 نومبر سے شروع ہوا، 18 نومبر تک جاری رہے گا۔
