پیانگ یانگ: شمالی کوریا نے ہائپرسونک میزائل کا کامیاب تجربہ کرنے کا دعویٰ کیا ہے۔
بین الاقوامی خبر رساں ادارے کے مطابق شمالی کوریا نے گزشتہ روز ایک میزائل تجربہ کرنے کی تصدیق کرتے ہوئے بتایا کہ ’ہائپرسونک میزائل‘ 6 ہزار 180 کلومیٹر فی گھنٹہ کی رفتار سے سفر کرتا ہے جو آواز کی رفتار سے پانچ گنا زیادہ ہے۔
شمالی کوریا کی فوج کی جانب سے جاری بیان میں کہا گیا کہ انتہائی اسٹرٹیجک اہمیت کے حامل اس میزائل کو جوہری ہتھیار لے جانے کے قابل بنایا جارہا ہے جو ملک کے دفاع کے لیے ایک سنگ میل ثابت ہوگا۔
گزشتہ روز جنوبی کوریا نے الزام عائد کیا تھا کہ شمالی کوریا نے کھلے سمندر میں مختصر فاصلے تک مار کرنے والا میزائل داغا ہے جب کہ جاپان نے دعویٰ کیا تھا کہ شمالی کوریا نے بیلسٹک میزائل کا تجربہ کیا ہے، لیکن شمالی کوریا نے اس پر خاموشی اختیار کی تھی۔
تاہم آج شمالی کوریا نے سرکاری سطح پر ہائپر سونک میزائل تجربے کی تصدیق کی ہے البتہ اس بیان پر تاحال امریکا، جنوبی کوریا اور جاپان نے کسی قسم کا ردعمل ظاہر نہیں کیا ہے۔
خیال رہے کہ شمالی کوریا اقوام متحدہ کی پابندیوں، امریکا سے معاہدے اور جنوبی کوریا سے ڈیل کو بالائے طاق رکھتے ہوئے رواں ماہ پہلے ہی ایٹمی صلاحیتوں کے حامل کروز میزائل اور بیلسٹک میزائل کے تین تجربات کرچکا ہے۔
