اسلام آباد: سابق وزیراعظم اور پی ٹی آئی کے سربراہ عمران خان نے آڈیو لیکس کی تحقیقات کے لیے عدالت عظمیٰ سے رجوع کرلیا۔
چیئرمین تحریک انصاف عمران خان کی جانب سے سپریم کورٹ میں دائر درخواست میں آڈیو لیکس کی تحقیقات کے لیے جوڈیشل کمیشن یا جے آئی ٹی بنانے کی استدعا کی گئی ہے۔
درخواست میں کہا گیا کہ وزیراعظم ہاؤس اور آفس کی نگرانی، ڈیٹا ریکارڈنگ اور آڈیو لیکس کو غیر قانونی قرار دیا جائے، آڈیو لیکس کی تحقیقات کرواکر ذمے داروں کو سزا دی جائے۔
سابق وزیراعظم نے درخواست میں کہا کہ حکومت اور متعلقہ اتھارٹیز کو مزید آڈیوز کی لیک روکنے کا حکم دیا جائے۔
چیئرمین پی ٹی آئی کی درخواست میں وزارت داخلہ، وزارت دفاع، وزارت آئی ٹی اور وزارت اطلاعات کو فریق بنایا گیا ہے۔ اس کے علاوہ درخواست میں آئی بی، ایف آئی اے اور پیمرا کو بھی فریق بنایا گیا ہے۔
خیال رہے کہ وزیراعظم شہباز شریف نے بھی وفاقی کابینہ کی منظوری سے آڈیو لیکس کی تحقیقات ایف آئی اے سے کروانے کی منظوری دی تھی، تاہم پاکستان تحریک انصاف نے ایف آئی اے کی تحقیقات کو مسترد کردیا تھا۔
