واشنگٹن: کنگال امریکی شہری راتوں رات کھرب پتی بن گیا۔ امریکا میں ایک شخص پر قسمت ایسی مہربان ہوئی کہ 2 ڈالر کے ٹکٹ پر 5 کھرب (2 ارب ڈالر) سے زیادہ کی لاٹری نکل آئی۔
ریاست کیلی فورنیا میں لاٹری بیچنے والے ادارے کے حکام نے میڈیا کو بتایا کہ لاٹری جیتنے والے شخص کا نام ایڈون کاسترو ہے۔ لاٹری جیتنے والے شخص کے بارے میں مزید تفصیلات جاری نہیں کی گئیں۔
ایڈون کاسترو نے نومبر 2022 میں لاٹری کا ٹکٹ 2 ڈالر کا خریدا تھا۔ یہ لاٹری امریکا کی 45 ریاستوں کے ساتھ ڈسٹرکٹ کولمیبا، پورٹوریکو اور ورجن آئی لینڈز میں بھی کھیلی جاتی ہے اور انتہائی مقبول ہے۔
لاٹری حکام نے ریکارڈ رقم جیتنے والے ایڈون کاسترو کو میڈیا میں آنے کی دعوت دی تھی، تاہم انہوں نے ایسا کرنے سے انکار کردیا۔ امریکی لاٹری قوانین کے تحت جیتنے والے کا نام اور دیگر تفصیلات جاری کرنے کے لیے قواعد اور ضوابط پر عمل کرنا لازمی ہے۔
