لاس اینجلس: روس سے تعلق رکھنے والا فرد حیرت انگیز طور پر بغیر ویزا اور ٹکٹ کے ڈنمارک کے دارالحکومت کوپن ہیگن سے جانے والی پرواز میں بیٹھ کر امریکا پہنچ گیا۔
میڈیا رپورٹس کے مطابق روس اور اسرائیلی شہریت کے حامل سرگئی ولادیمیر اوویچ کو امریکی پولیس نے لاس اینجلس میں گرفتار کیا۔ مزید برآں روسی شہری کا نام پرواز میں سفر کرنے والے مسافروں کی فہرست میں بھی نہیں تھا۔
ایف بی آئی حکام کی جانب سے استفسار کرنے پر سرگئی ولادیمیر نے بیان دیا کہ وہ اپنا پاسپورٹ طیارے میں ہی بھول گیا تاہم تحقیق کرنے پر اس کا دعویٰ غلط نکلا۔
پرواز کے عملے نے مقامی میڈیا کو بتایا کہ سرگئی کو جہاز میں بیٹھے کافی لوگوں نے دیکھا کہ وہ بار بار اپنی سیٹ بدل رہا تھا۔ پرواز کے دوران اس نے ایئر ہوسٹس سے دو بار کھانا مانگا اور یہاں تک کہ پرواز کے عملے کے لیے رکھی گئی چاکلیٹ بھی کھانے کی کوشش کی۔
ایف بی آئی کے ایک اہلکار کی جانب سے کی گئی تفتیش میں روسی شہری کا کہنا تھا کہ وہ الجھن کا شکار ہے۔ تین دن سے سویا نہیں اور اسے کچھ بھی یاد نہیں کہ وہ طیارے پر کیسے سوار ہوا اور وہ بھی بغیر ٹکٹ یا ویزا کے۔
ایف بی آئی کی جانب سے سرگئی ولادیمیر اوویچ کے خلاف شکایت درج کرلی گئی ہے اور تحقیقات کا آغاز کردیا گیا ہے۔