لاہور: پاکستان کو انگلینڈ کے ہاتھوں ہوم سیریز میں شکست، ساتویں اور فیصلہ کن میچ میں مہمان ٹیم انگلینڈ نے پاکستان کو 67 رنز سے شکست دے کر سیریز 3-4 سے اپنے نام کرلی۔
ہدف کے تعاقب میں قومی ٹیم مقررہ اوورز میں 8 کھلاڑیوں کے نقصان پر 142 رنز تک محدود رہی۔ آل راؤنڈر شاداب خان فیلڈنگ کے دوران ہیمسٹرنگ اسٹرین کا شکار ہوئے، جس کے باعث وہ میچ میں بیٹنگ کرنے نہیں آسکے.
ہدف کے تعاقب میں کپتان بابراعظم 4 رنز، محمد رضوان ایک رن اور افتخار احمد 19 رنز بناکر پویلین لوٹ گئے۔ چوتھی وکٹ کی شراکت میں 53 رنز بنائے گئے لیکن یہاں خوشدل شاہ 27 رنز بنا کر آؤٹ ہوئے۔
اس کے بعد آصف علی 7 رنز اور محمد نواز 9 رنز بنا کر پویلین لوٹ گئے جب کہ شان مسعود 56 رنز کی اننگز کھیل کر آؤٹ ہوئے۔ محمد وسیم جونیئر 5 رنز بنا کر چلتے بنے۔
انگلینڈ نے مقرر اوورز میں تین وکٹوں کے نقصان پر 209 رنز بنائے۔ انگلش ٹیم نے بیٹنگ شروع کی تو الیکس ہیلز 18 رنز بنا کر ایل بی ڈبلیو اور فل سالٹ 20 رنز بنا کر رن آؤٹ ہوگئے۔ مہمان ٹیم نے تیسری وکٹ کی شراکت میں 62 رنز بنائے لیکن یہاں بین ڈکٹ 30 رنز بنا کر وکٹ کیپر محمد رضوان کے ہاتھوں اسٹمپ آؤٹ ہوگئے۔
چوتھی وکٹ کی شراکت میں 108 رنز بنائے گئے جس میں 52 رنز ڈیوڈ ملان اور 46 رنز ہیری بروک کے شامل ہیں۔
کپتان بابراعظم نے ڈیوڈ ملان کا 30 رنز پر پہلا کیچ چھوڑا کیا، جس کے بعد 62 رنز پر محمد وسیم نے ڈیوڈ ملان کا دوسرا کیچ چھوڑ دیا۔ وہ 78 رنز بنا کر ناقابل شکست رہے۔
محمد وسیم جونیئر نے 4 اوورز میں سب سے زیادہ 61 رنز دیے۔
قومی ٹیم کے کپتان بابراعظم کا کہنا تھا کہ ٹیم میں محمد رضوان، خوشدل شاہ، محمد حسنین اور حارث رؤف کی واپسی ہوئی ہے جب کہ محمد حارث، حیدر علی، عامر جمال اور شاہ نواز ڈاہانی کو ٹیم سے ڈراپ کیا گیا۔
