اسلام آباد: ملک میں کورونا سے مزید 63 افراد اپنی زندگی کی بازی ہار گئے اور 4300 سے زائد کیسز بھی رپورٹ ہوئے ہیں جو 8 ماہ بعد ایک روز میں رپورٹ ہونے والے سب سے زیادہ کیسز ہیں۔
پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 42418 ٹیسٹ کیے گئے جن میں سے 4368 افراد میں کورونا وائرس کی تصدیق ہوئی جب کہ وائرس سے 63 اموات ہوئیں۔
پچھلے 24 گھنٹوں کے دوران رپورٹ شدہ کیسز گزشتہ سال کورونا کی پہلی لہر میں 3 جولائی کے بعد سامنے آنے والے سب سے زیادہ کیسز ہیں۔
سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 10.29 فیصد رہی۔
پاکستان میں کورونا کے باعث جاں بحق افراد کی تعداد 14091 ہوگئی اور مجموعی کیسز 6 لاکھ 45356 تک جاپہنچے ہیں جب کہ فعال کیسز کی تعداد 40120 ہے۔
اس کے علاوہ 24 گھنٹوں کے دوران ملک بھر میں 2170 مریض کورونا سے صحت یاب بھی ہوئے ہیں جس کے بعد مجموعی طور پر صحت یاب ہونے والوں کی تعداد 591145 ہوگئی ہے۔
سرکاری پورٹل کے مطابق سندھ میں کورونا کے مریضوں کی مجموعی تعداد 264062 ہوگئی ہے جب کہ 4486 افراد اب تک انتقال کرچکے ہیں۔
پنجاب میں کورونا کے کل مریضوں کی تعداد 207765 ہے اور 6142 افراد وائرس میں مبتلا ہوکر جان سے جاچکے ہیں جب کہ بلوچستان میں مریضوں کی کل تعداد 19427 اور ہلاکتیں 205 ہوچکی ہیں۔
خیبرپختونخوا میں کورونا کے مریضوں کی تعداد 82677 اور 2260 ہلاکتیں ہوچکی ہیں جب کہ آزاد کشمیر میں 12095 افراد وائرس میں مبتلا ہوچکے ہیں اور 340 افراد انتقال کرگئے۔
اس کے علاوہ گلگت بلتستان میں اب تک کورونا کے مریضوں کی تعداد 4983 اور 103 افراد انتقال کرچکے ہیں۔
اسلام آباد میں کورونا کے مریضوں کی مجموعی تعداد 54347 ہے اور اب تک 555 مریض انتقال کرچکے ہیں۔
