انگلش بیل نے دُنیا کے سب سے بڑے بیل کا گنیز ورلڈ ریکارڈ بناڈالا

چیشائر: انگلینڈ میں 13 سالہ سوئس بیل کو حال ہی میں دنیا کا سب سے بڑے بیل کا اعزاز دیا گیا، جس کی اونچائی 1.87 میٹر (6 فٹ 1 انچ) ہے۔
میڈیا رپورٹس کے مطابق ٹامی نامی یہ بیل بیلاوینڈر کی فیملی کے ساتھ چیشائر میں ان کے فارم میں اس وقت سے رہ رہا ہے جب وہ ایک دن کا تھا۔ اسے صرف 10 ڈالر میں خریدا گیا تھا اور آج اس کی قیمت اس سے کہیں زیادہ ہے۔ تاہم بیلاوینڈر اسے ایک اثاثے سے زیادہ خاندان کے ایک فرد کے طور پر دیکھتے ہیں، اس لیے وہ اسے فروخت کرنے کو تیار نہیں۔
براؤن سوئس نامی مویشیوں کی اس نسل کے جسم عام طور پر دودھ دینے والی گایوں سے بڑے ہوتے ہیں، لیکن انہیں درمیانے درجے کی نسل سمجھا جاتا ہے۔ تاہم ٹامی نامی یہ بیل سب سے مختلف نکلا ہے۔
ایک عام براؤن سوئس گائے کا وزن 1,300 سے 1,400 پاؤنڈ کے درمیان ہوتا ہے اور 2,000 پاؤنڈ تک پہنچ سکتا ہے۔ ٹامی کا وزن قریباً 3,000 پاؤنڈ ہے جو اسے اپنی نسل کے حساب سے کافی بھاری بھرکم بنا دیتا ہے۔