کراچی: فہد مصطفیٰ اور مہوش حیات ایک طویل وقفے کے بعد ایک بار پھر اسکرین پر ایک ساتھ جلوہ گر ہورہے ہیں اور اس بار ان کی آن اسکرین کیمسٹری نے ریلیز سے پہلے ہی خوب توجہ سمیٹ لی ہے۔
دونوں اداکار آٹھ سال بعد ہارر فلم ’’زومبیڈ‘‘ کے ذریعے ایک ساتھ کام کررہے ہیں، جو عیدالاضحیٰ کے موقع پر سنیما گھروں کی زینت بنے گی۔ اس وقت دونوں اسٹارز اپنی فلم کی بھرپور پروموشن میں مصروف ہیں جب کہ مداح بھی اس جوڑی کی واپسی پر خاصے پرجوش نظر آرہے ہیں۔
حال ہی میں فلم کا رومانوی گانا ’’ذرا ذرا‘‘ ریلیز کیا گیا ہے، جسے گلوکار ثمر جعفری نے اپنی آواز دی ہے۔ گانے میں فہد مصطفیٰ اور مہوش حیات کے درمیان رومانوی مناظر نے فلم کی کہانی اور ان کی آن اسکرین کیمسٹری کو مزید نمایاں کر دیا ہے۔
دونوں اداکاروں نے پروموشنز کے دوران یہ بھی اعتراف کیا کہ ’’زومبیڈ‘‘ ان کی مشترکہ فلموں میں سب سے زیادہ رومانوی پروجیکٹ ہے، جس کی وجہ سے فلم کے حوالے سے تجسس مزید بڑھ گیا ہے۔
تاہم سوشل میڈیا پر ان مناظر کو لے کر ملا جلا ردعمل سامنے آیا ہے۔ کچھ صارفین نے اسے ضرورت سے زیادہ رومانوی قرار دیتے ہوئے تنقید کی جب کہ بعض نے اسے فلمی کہانی کا حصہ قرار دے کر دفاع بھی کیا۔
ایک صارف نے تبصرہ کرتے ہوئے لکھا کہ وہ اداکار کی اہلیہ کے صبر کو سلام پیش کرتے ہیں جبکہ کچھ صارفین نے پاکستانی ڈراموں اور فلموں میں مواد کے معیار پر بھی سوالات اٹھائے۔ اسی طرح کچھ نے اسے بالی ووڈ کی غیر ضروری نقل قرار دیا، جبکہ دیگر نے اسے عالمی فلمی رجحانات سے متاثر قرار دیا۔
’’زومبیڈ‘‘ کی ریلیز سے پہلے ہی فہد مصطفیٰ اور مہوش حیات کی جوڑی ایک بار پھر سوشل میڈیا پر موضوعِ بحث بن چکی ہے اور فلم کے لیے تجسس میں مزید اضافہ ہوگیا ہے۔
