دبئی: یو اے ای نے 2024 تک چاند پر خلائی جہاز روانہ کرنے کا اعلان کردیا ہے۔
امارات کے وزیراعظم اور دبئی کے فرماں روا شیخ محمد بن راشد المکتوم نے ٹویٹ کے ذریعے اعلان کیا کہ امارات چاند گاڑی تیار کررہا ہے، جو 2024 میں چاند پر اُتر جائے گی اور چاند کے ان علاقوں میں نئی دریافتیں کرے گی، جو اس سے قبل بھیجے گئے انسانی مشنز میں ممکن نہ ہوسکی۔ اس مشن سے حاصل ہونے والے ڈیٹا کا تبادلہ عالمی سطح پر تحقیقی مراکز اور اداروں کے ساتھ کیا جائے گا۔
دبئی کے فرمانروا نے یہ بھی اعلان کیا کہ چاند پر بھیجی جانے والی گاڑی کو ان کے مرحوم والد شیخ راشد بن سعید المکتوم سے موسوم کرکے ’راشد‘ کا نام دیا جائے گا۔ ان کا کہنا ہے کہ مشن کے لیے بنائی جانے والی گاڑی سو فیصد مقامی انجینئر تیار کریں گے۔ اس سے قبل امارات امل (امید) کے نام سے مریخ کے لیے بھی ایک مشن روانہ کرنے کا علان کرچکا ہے۔
خیال رہے کہ اگر متحدہ عرب امارات چاند پر پہنچنے کے اپنے مشن میں کامیاب ہوجاتا ہے تو امریکا، سابق سوویت یونین اور چین کے بعد وہ چاند پر پہنچنے والا چوتھا ملک ہوگا۔ اس سے قبل بھارت، اسرائیل اور جاپان کے چاند پر بھیجے جانے والے مشن ناکام ہوچکے ہیں۔
