شوبز انڈسٹری سے ایک انتہائی افسوس ناک اطلاع سامنے آئی ہے، ملک کے معروف اور سینئر اداکار سہیل اصغر انتقال کرگئے۔
اُن کی اہلیہ نے سہیل اصغر کے انتقال کی تصدیق کرتے ہوئے بتایا کہ سینئر اداکار ایک ہفتے سے اسپتال میں زیر علاج تھے۔ وہ آج صبح ساڑھے گیارہ بجے انتقال کرگئے۔ ان کی نماز جنازہ اتوار کو نماز عصر کے بعد بحریہ ٹاؤن میں ادا کی جائے گی۔
سہیل اصغر کی اہلیہ نے بتایا ان کے شوہر گزشتہ ڈیڑھ سال سے علیل تھے، ڈیڑھ سال قبل ان کا بڑی آنت کا آپریشن بھی ہوا لیکن وہ ٹھیک نہیں ہوسکے تھے۔
خیال رہے کہ سہیل اصغر کا شمار پاکستان کے کامیاب اور بہترین اداکاروں میں کیا جاتا ہے۔ ان کی پیدائش لاہور میں ہوئی اور وہیں انہوں نے تعلیم مکمل کی، جس کے بعد وہ ریڈیو پاکستان کا حصہ بن گئے۔
1978 سے 1988 تک 10 سال کے لیے سہیل اصغر ریڈیو جوکی کے طور پر کام کرتے رہے جس کے بعد انہوں نے تھیٹر ڈراموں میں اداکاروں شروع کردی۔ وہ اپنے کیریئر میں ’لاگ‘، ’پیاس‘، ’چاند گرہن‘، ’کاجل گھر‘ جیسے ڈراموں میں کام کرچکے ہیں۔
