اسلام آباد: پاکستان اور بھارت کے ڈائریکٹر جنرل ملٹری آپریشنز (ڈی جی ایم اوز) کے درمیان رابطے کے دوران کشیدگی میں کمی اور امن کی جانب پیش رفت پر عمومی اتفاق رائے کیا گیا ہے۔
رپورٹ کے مطابق علاقائی اور بین الاقوامی سفارتی کوششوں کے نتیجے میں پاکستان اور بھارت کے درمیان حالیہ کشیدگی کم کرنے پر عمومی اتفاق رائے سامنے آگیا۔
دونوں ممالک نے اس بات پر آمادگی ظاہر کی ہے کہ افواج کو رفتہ رفتہ امن کے دوران تعینات پوزیشنوں پر واپس لایا جائے گا۔
ذرائع نے کہا کہ سیز فائر اور کشیدگی میں کمی کی حتمی تاریخ کا اعلان نہیں کیا گیا، تاہم دونوں فریقین کے درمیان ایک "غیر رسمی مفاہمت” موجود ہے، جس کا مقصد موجودہ محاذ آرائی کو کم کرکے خطے میں امن و استحکام کی بحالی ہے۔
خیال رہے کہ بھارت مسلسل چار روز تک پاکستان پر حملہ آور رہا تھا، اس نے شہری آبادی کو نشانہ بنایا۔ پاک افواج نے اس کے تمام تر حملوں کو انتہائی مہارت سے ناکام بنایا۔ جس کے بعد 10 مئی کی علی الصبح آپریشن بُنیان مرصوص کیا گیا، جس کے بعد بھارت نے گھٹنے ٹیکے اور سیزفائر کے لیے امریکا سے درخواست کی۔
