لاڑکانہ: پی ڈی ایم کے سربراہ مولانا فضل الرحمان نے گڑھی خدا بخش میں ہونے والے جلسے میں شرکت سے معذرت کرلی۔
نجی ٹی وی کے مطابق پیپلز پارٹی کے شریک چیئرمین آصف زرداری کی کال کے باوجود مولانا فضل الرحمان نے لاڑکانہ آمد سے معذرت کرلی ہے اور اب سربراہ جے یو آئی (ف) گڑھی خدا بخش بھٹو میں ہونے والے جلسہ میں شرکت نہیں کریں گے۔
جمعیت علمائے اسلام کے سینئر رہنما مولانا راشد محمود نے مولانا فضل الرحمان کی گڑھی خدا بخش جلسے میں شرکت سے معذرت کی تصدیق کرتے ہوئے بتایا کہ سربراہ جے یو آئی کی جگہ پارٹی کے مرکزی رہنماؤں کا 5 رکنی وفد جلسے میں شرکت کرے گا، جس میں جے یو آئی ف کے مرکزی سیکریٹری جنرل مولانا عبدالغفور حیدری، سراج احمد خان امروٹی، عبدالرزاق عابد لاکھو، سعود افضل ہالیجوی اور مولانا عبداللہ مہر شامل ہوں گے۔
پیپلزپارٹی کے شریک چیئرمین آصف زرداری نے پی ڈی ایم کے سربراہ مولانا فضل الرحمان کو بے نظیر بھٹو کے یوم شہادت پر گڑھی خدا بخش جلسے میں شرکت کی دعوت دی تھی جب کہ پیپلز پارٹی کے چیئرمین بلاول بھٹو زرداری نے مریم نواز کو اپنی والدہ بے نظیر بھٹو کی برسی کی تقریب میں شرکت کے لیے گڑھی خدا بخش آنے کی دعوت دی تھی۔
مریم نواز کی قیادت میں مسلم لیگ (ن) کی اعلیٰ ترین قیادت 27 دسمبر کو بے نظیر بھٹو کی برسی کے اجتماع میں شرکت کرے گی جب کہ مولانا فضل الرحمان نے معذرت کرلی۔
