اسلام آباد: موسم سرما میں حسب روایت شہری گیس بحران کے لیے تیار ہوجائیں کہ حکومت نے سردیوں کے لیے گیس لوڈ منیجمنٹ پلان کی تجاویز تیار کرلیں۔
ذرائع کے مطابق پلان منظوری کی خاطر آج کابینہ توانائی کمیٹی میں پیش کیا جائے گا جس میں گھریلو، کمرشل صارفین کو سنگین گیس بحران سے بچانے کے اقدامات تجویز کیے گئے ہیں۔
سوائے ایکسپورٹ کے جنرل انڈسٹری کو 2 ماہ کے لیے گیس کی فراہمی بند کرنے اور سی این جی سیکٹر کو بھی 2 ماہ کے لیے گیس کی فراہمی بند کرنے کی تجویز دی گئی ہے۔ کیپٹو پاور پلانٹس کے لیے بھی گیس کی فراہمی بند کرنے کی تجویز ہے۔
جنوری میں 575 ایم ایم سی ایف ڈی ایل این جی اور فروری میں 332 ایم ایم سی ایف ڈی ایل این جی گھریلو اور کمرشل شعبے کو منتقل کرنے کی تجویز ہے۔
سوئی ناردرن کی 3 ماہ کے لیے 92 ارب روپے سے زائد کی ایل این جی اور دسمبر میں 361 ایم ایم سی ایف ڈی ایل این جی گھریلو، کمرشل شعبے کو دینے کی تجویز ہے۔
ملک میں اگلے ماہ دسمبر 2021 میں 592 ایم ایم سی ایف ڈی گیس اور جنوری 2022 میں 772 ایم ایم سی ایف ڈی گیس کی قلت کا تخمینہ ہے۔
