کیا عمران عباس اور اُشنا شاہ نے شادی کرلی؟

کراچی: معروف اداکار عمران عباس اور اشنا شاہ اگرچہ متعدد ڈراموں میں دولہا اور دلہن کا کردار ادا کرچکے، تاہم حال ہی میں وہ اپنی شادی کی ویڈیوز دیکھ کر حیران رہ گئے۔
اشنا شاہ اور عمران عباس نے انسٹاگرام اسٹوریز میں اپنی شادی کی ویڈیوز اور تصاویر شیئر کرتے ہوئے خوش گوار حیرت کا اظہار کیا اور اس بات پر ہنستے رہے کہ انہوں نے کب شادی کی؟۔
اشنا شاہ نے اپنی شادی کی جعلی ویڈیو چلانے والے یوٹیوب چینل کا اسکرین شاٹ شیئر کرتے ہوئے عمران عباس کو مینشن کرتے ہوئے انہیں مزاحیہ انداز میں مبارک باد پیش کی۔

اسی طرح عمران عباس نے بھی شادی کی ویڈیو کا اسکرین شاٹ شیئر کرتے ہوئے اداکارہ کو مینشن کیا اور ساتھ ہی یوٹیوبرز کو تجویز دی کہ وہ تصاویر کا فوٹوشاپ تو اچھے طریقے سے کرتے۔
عمران عباس نے مزاحیہ انداز میں یہ بھی لکھا کہ وہ اپنی شادی سے متعلق مداحوں کو بتانا اور انسٹاگرام پر اپ ڈیٹ دینا بھول گئے تھے۔
یہ پہلا موقع نہیں کہ عمران عباس کی شادی کی افواہیں پھیلی ہوں، اس سے قبل دسمبر 2020 میں بھی عمران عباس کی اداکارہ علیزے شاہ سے شادی کی افواہیں پھیلی تھیں۔
عمران عباس کی طرح ماضی میں اشنا شاہ بھی اپنی شادی کے حوالے سے بات کر چکی اور بتا چکی ہیں کہ وہ ایسے شخص سے شادی کریں گی جو وفادار، پُرخلوص، ایمان دار اور سچا ہو۔