لاہور: پنجاب کے نگراں وزیراعلیٰ محسن نقوی بلامقابلہ پاکستان کرکٹ بورڈ (پی سی بی) کے چیئرمین منتخب ہوگئے۔
ذرائع کے مطابق محسن نقوی بلامقابلہ پی سی بی کے 37 ویں چیئرمین منتخب ہوگئے ہیں۔
ذرائع کا بتانا ہے کہ قائم مقام چیئرمین پی سی بی اور الیکشن کمشنر شاہ خاور، محسن نقوی کے چیئرمین منتخب ہونے کا باقاعدہ اعلان کریں گے۔
ذرائع کے مطابق پی سی بی ہیڈ کوارٹر میں ہونے والے گورننگ بورڈ کے خصوصی اجلاس میں پیٹرن کے دو نمائندے محسن نقوی اور مصطفیٰ رمدے شامل تھے، ان کے علاوہ آزاد جموں و کشمیر، ڈیرہ مراد جمالی، لاڑکانہ، بہاولپور، سوئی ناردرن گیس، غنی گلاس، اسٹیٹ بینک اور پی ٹی وی گورننگ بورڈ کا حصہ تھے۔
محسن نقوی کو پاکستان کرکٹ بورڈ کے چیئرمین کے لیے مضبوط ترین امیدوار تصور کیا جارہا تھا، جو اس وقت نگراں وزیراعلیٰ پنجاب کی ذمے داریاں بھی نبھا رہے ہیں۔
چیئرمین پی سی بی کی تعیناتی تین سال کے لیے ہوتی ہے اور ذرائع کا بتانا ہے کہ محسن نقوی 8 فروری کو ہونے والے عام انتخابات کے بعد عہدے کا چارج سنبھالیں گے۔
