ڈھاکا: بنگلادیش میں طلبا تحریک کے سرکردہ رہنما شریف عثمان ہادی کو سپرد خاک کر دیا گیا۔
بنگلادیشی میڈیا کے مطابق قاتلانہ حملے میں شدید زخمی ہو کر سنگاپور میں دوران علاج دم توڑنے والے انقلاب منچہ کے ترجمان شریف عثمان ہادی کی نماز جنازہ ڈھاکا میں پارلیمنٹ کے ساؤتھ پلازا میں ادا کی گئی۔
میڈیا رپورٹس کے مطابق شریف عثمان ہادی کی نماز جنازہ میں چیف ایڈوائزر بنگلادیش محمد یونس سمیت ہزاروں افراد نے شرکت کی۔ بعدزاں بنگلادیش کی طلبہ تحریک کے رہنما شریف عثمان ہادی کو آہوں اور سسکیوں کے ساتھ سپرد خاک کر دیا گیا۔
یاد رہے کہ بنگلادیش کے طالب علم رہنما شریف عثمان ہادی کی میت گزشتہ روز سنگاپور سے ڈھاکا پہنچائی گئی تھی جبکہ چیف ایڈوائزر بنگلادیش محمد یونس نے عثمان ہادی کے انتقال پر ایک روزہ سوگ کا اعلان بھی کیا تھا۔
شریف عثمان ہادی جمعرات کی شب سنگاپور جنرل اسپتال میں انتقال کر گئے تھے، 12 دسمبر کو ڈھاکا کے علاقے پرانا پلٹن میں انتخابی مہم کے دوران حملہ آوروں کی فائرنگ سے ان کے سر پر شدید زخم آئے تھے۔
ابتدائی طور پر انہیں ڈھاکا میڈیکل کالج اسپتال اور ایور کیئر اسپتال منتقل کیا گیا، جس کے بعد 15 دسمبر کو بہتر علاج کے لیے سنگاپور لے جایا گیا جہاں وہ زخموں کی تاب نہ لاتے ہوئے چل بسے۔
شریف عثمان ہادی جولائی 2025 میں حسینہ واجد حکومت کا تختہ الٹنے والی طلبہ تحریک کے اہم رہنما تھے اور طلبہ رہنماؤں کے قائم کردہ سیاسی پلیٹ فارم انقلاب منچہ کے ترجمان بھی تھے۔
