لاڑکانہ: لاڑکانہ سے تعلق رکھنے والے خاندان نے 3 منفرد عالمی ریکارڈز قائم کردیے۔
سندھ کے ضلع لاڑکانہ کے ایک خاندان نے ایک نہیں 3 عالمی ریکارڈ قائم کرکے انوکھی مثال قائم کردی ہے۔
لاڑکانہ سے تعلق رکھنے والے ریٹائرڈ ٹیچر امیر آزاد منگی کی پیدائش، شادی، اہلیہ کی پیدائش اور7 بچوں کی پیدائش سمیت سب یکم اگست کو ہوئی، اب سالگرہ بھی سب گھر والے ایک ہی کیک پر مناتے ہیں۔
امیر آزاد منگی کو شکوہ ہے کہ 3 عالمی ریکارڈز حاصل کرنے کے باوجود حکومتی سطح پر ان کی کوئی حوصلہ افزائی نہیں کی گئی۔
اس ضمن میں لاڑکانہ کے ممتاز اسکاؤٹ لیڈر نثار مغیری کا کہنا تھا کہ لاڑکانہ اعزازات کا شہر رہا ہے، یہاں سے تعلق رکھنے والوں نے عالمی سطح پر ملک و قوم کا نام روشن کیا ہے، خواہ سیاسی ہو یا سماجی، ذوالفقار علی بھٹو کی اسلامی بلاک کیلئے ایٹمی ٹیکنالوجی، عالم اسلام کی پہلی خاتون وزیراعظم سمیت بہت سے اعزازات لاڑکانہ سے تعلق رکھنے والی شخصیات نے بنائے ہیں۔