کراچی: ٹی وی اور فلموں کی صف اول کی اداکارہ نیلم منیر کے جلد ہی شادی کے بندھن میں بندھنے کی اطلاعات آرہی ہیں۔
نیلم کی شادی سے متعلق معروف سوشل میڈیا بلاگر و سلیبریٹیز کے انتہائی قریبی عرفان نے انکشاف کیا ہے۔
عرفانستان نامی پیج پر عرفان نے جمعہ کی دوپہر ایک پوسٹ شیئر کی، جس میں بتایا گیا کہ نیلم منیر اگلے ماہ یعنی دسمبر میں شادی کرنے والی ہیں، جو متحدہ عرب امارات میں ہوگی۔
عرفان کی جانب سے شیئر کردہ سوشل میڈیا پوسٹ وائرل ہوگئی، تاہم انہوں نے یہ نہیں بتایا کہ اداکارہ کی شادی کس سے اور کس تاریخ کو ہونے جارہی ہے۔
دوسری جانب اداکارہ نیلم نے بھی اپنے انسٹاگرام پر اس حوالے سے کچھ پوسٹ نہیں کیا۔
خیال رہے کہ اس سے قبل بھی کئی مرتبہ نیلم منیر کی شادی کی افواہیں زیرِ گردش رہیں، جس کے بعد اداکارہ نے ان افواہوں کی تردید کی۔
خیال رہے کہ دو سال قبل ایک انٹرویو میں نیلم منیر کا اپنی شادی سے متعلق گفتگو کرتے ہوئے کہنا تھا کہ میری شادی کی خبر اچانک ہی سننے کو ملے گی لیکن میں شادی سادگی سے کروں گی۔
