کراچی: پاکستان ٹیلی وژن کے سینئر اداکار مظہر علی انتقال کرگئے۔
اداکار مظہر علی طویل عرصے سے دل اور پھیپھڑوں کے مرض میں مبتلا تھے اور گزشتہ کئی سال سے امریکی شہر ہیوسٹن میں رہائش پذیر تھے۔ ابھی وہ کراچی کے ایک نجی اسپتال میں زیر علاج تھے۔ مرحوم کی فیملی کینیڈا میں مقیم ہے۔
اطلاعات کے مطابق مرحوم دل کے عارضے کے باعث اسپتال میں زیر علاج تھے۔ مظہر علی کے لواحقین میں دو بیٹیاں، ایک بیٹا اور اہلیہ شامل ہیں۔
مظہر علی نے پاکستان ٹیلی ویژن پر نشر ہونے والے کئی مقبول ڈراموں میں یادگار کردار ادا کیے، جن میں ’’افشاں‘‘، ’’عروسہ‘‘، ’’شاہین‘‘، ’’کالی دیمک‘‘ اور ’’کانچ کی گڑیا‘‘ شامل ہیں۔ مظہر علی نے اپنی لاجواب اداکاری سے شائقین میں بہت شہرت حاصل کی۔
اہل خانہ نے مظہر علی کے انتقال کی تصدیق کرتے ہوئے کہا کہ مرحوم کی نماز جنازہ آج بعد مغرب طیبہ مسجد ناظم آباد نمبر 3 میں ہوگی۔
