اسلام آباد: احتساب عدالت نے آصف علی زرداری کے قابل ضمانت وارنٹ گرفتاری جاری کردیے۔
احتساب عدالت کے جج محمد اصغر علی نے سابق صدر آصف علی زرداری، سابق وزیراعظم نواز شریف کے خلاف توشہ خانہ ریفرنس پر سماعت کی۔
نیب پراسیکیوٹر نے نواز شریف کو سمن برطانیہ بھجوانے کی رپورٹ عدالت میں پیش کرتے ہوئے بتایا کہ سابق وزیراعظم برطانیہ میں موجود ہیں جنہیں دفتر خارجہ کے ذریعے وارنٹس بھیجے ہیں۔
آصف زرداری کے وکیل فاروق ایچ نائیک نے حاضری سے استثنیٰ کی درخواست دائر کی۔
جج اصغر علی نے کہا کہ فوجداری کیس ہے اس لیے آصف زرداری کو پیش تو ہونا پڑے گا، نواز شریف کے ناقابل ضمانت وارنٹس پر کوئی عمل درآمد نہ ہوسکا، وہ دانستہ طور پر عدالتی کارروائی کا حصہ نہیں بن رہے۔
احتساب عدالت نے سابق صدر آصف زرداری کی استثنیٰ کی درخواست مسترد کرتے ہوئے اُن کے قابل ضمانت وارنٹ گرفتاری جاری کردیے اور سماعت 17 اگست تک ملتوی کردی۔
