کراچی: ہالی وُڈ یا بولی وُڈ انڈسٹری میں کام کرنے کی خواہش متعدد اداکاروں کو ہوتی ہے، لیکن پاکستان سے تعلق رکھنے والے ٹی وی اسٹار عفان وحید ایسے اداکار ہیں جنہوں نے ہالی وُڈ سے کام کی پیشکش کو ٹھکرادیا۔
اداکار عفان وحید نے حال ہی میں ایک انٹرویو کے دوران انکشاف کیا کہ انہیں 2 ماہ قبل ہالی وُڈ سے پیش کش کی گئی تھی۔
انہوں نے بتایا کہ یہ آفر انہیں ہالی وُڈ اسٹار نکول کڈمین کے ساتھ کام کرنے کی آئی تھی لیکن انہوں نے اس پیشکش سے متعلق کسی کو اس لیے نہیں بتایا کیونکہ وہ جانتے تھے کہ وہ یہ کردار نہیں نبھا پائیں گے۔
عفان وحید نے پیشکش کو مسترد کیے جانے سے متعلق وضاحت دیتے ہوئے بتایا کہ ایسا انہوں نے اس لیے کیا کیوں کہ وہ اس وقت اپنی فلم کی شوٹنگ پر جارہے تھے۔
اداکار کے مطابق ہالی وُڈ کو مذکورہ کردار کے لیے فٹ بال یا باسکٹ بال پلیئر چاہیے تھا جو بہت اچھا کھیل سکے اور وہ دونوں کھیلوں میں سے کسی ایک کھیل کے لیے بھی اچھے کھلاڑی نہیں۔
انہوں نے بتایا کہ اس دوران ان کے پاس وقت بھی نہیں تھا کہ وہ ان کھیلوں کی تربیت لے سکیں لہٰذا بہتر کردار ادا نہ کرنے کی وجہ سے فلم کرنے کی ضرورت محسوس نہیں کی۔
اداکار عفان وحید نے مزید انکشاف کیا کہ انہیں تین چار سال پہلے بالی وُڈ سے بھی پیشکش کی گئی تھی لیکن کاسٹنگ ڈائریکٹر کی جانب سے پیغام چونکہ فیس بک پر موصول ہوا تھا لہٰذا وہ چیک نہیں کرپائے اور یہ پیغام 2 سال بعد پڑھا تو سوائے معذرت کے کچھ نہ کرسکا۔