لاہور: اداکارہ وینا ملک نے شوبز سے دوری کے دوران ’’نفسیات‘‘ میں اپنی پڑھائی مکمل کرلی ہے۔
وینا ملک جو کچھ عرصے سے شوبز سے دور رہی ہیں، انہوں نے بتایا کہ اس بریک کے دوران انہوں نے سائیکالوجی میں بیچلرز کی ڈگری حاصل کی اور ماسٹرز کے امتحانات بھی دیے ہیں، جس کا ابھی نتیجہ نہیں آیا۔
وینا کا کہنا تھا کہ انہوں نے ہارورڈ میڈیکل اسکول سے ذہنی صحت کے حوالے سے کچھ کورسز میں سرٹیفکیٹس بھی حاصل کیے ہیں۔
وینا نے شوبز سے عارضی وقفہ سے متعلق بتایا کہ میں منظرعام سے ہٹ گئی تھی لیکن اس دوران میں نے بہت سی چیزیں کیں جو میرے لیے بہت کارآمد رہیں، میں نے اس بریک کے دوران اپنی ساری توجہ تعلیم حاصل کرنے پر مرکوز کیے رکھی۔
انہوں نے مزید کہا کہ پہلے ترجیحات میں صرف کیریئر تھا مگر اب اور بھی ترجیحات ہیں، سو کوئی بھی پروجیکٹ لینے سے پہلے دیگر عوامل کو بھی دیکھنا ہوتا ہے۔
خیال رہے کہ اداکارہ وینا ملک کی پہلی شادی 25 دسمبر 2013 میں دبئی کے ایک بزنس مین اسد خٹک سے ہوئی تھی، جن سے ان کے دو بچے ہیں۔
2017 میں وینا نے اسد خٹک سے خلع لے لی تھی اور ان کے بچوں کی حوالگی کے تنازع نے بھی خبروں میں جگہ بنائی تھی۔ ان دنوں وینا کی دوسری شادی کے حوالے سے بھی خبریں سامنے آرہی ہیں۔
