تہران: امریکا نے ایران کے شہر اصفہان میں ایک اہم عسکری ہدف پر فضائی حملہ کیا ہے، جس میں 2 ہزار پاؤنڈ وزنی بنکر بسٹر بم استعمال کیے گئے۔ بین الاقوامی میڈیا رپورٹس کے مطابق اس کارروائی کا مقصد ایک بڑے اسلحہ ڈپو کو تباہ کرنا تھا، جہاں مبینہ طور پر ہتھیار اور فوجی سازوسامان ذخیرہ کیا گیا تھا۔ امریکی حکام کا کہنا ہے کہ یہ حملہ انتہائی منصوبہ بندی کے تحت کیا گیا تاکہ حساس فوجی تنصیبات کو نشانہ بنایا جا سکے۔
حملے کے فوراً بعد علاقے میں زوردار دھماکے سنے گئے اور مختلف سوشل میڈیا پلیٹ فارمز پر ان دھماکوں کی ویڈیوز بھی وائرل ہوئیں، جن میں آگ کے شعلے اور دھوئیں کے بادل واضح طور پر دیکھے جا سکتے ہیں۔ اس واقعے نے نہ صرف ایران بلکہ عالمی سطح پر بھی تشویش کی لہر دوڑا دی ہے۔
امریکا کے صدر ڈونلڈ ٹرمپ نے بھی اس حملے کی ویڈیو سوشل میڈیا پر شیئر کی، جسے بعض مبصرین ایران کے لیے ایک سخت پیغام قرار دے رہے ہیں۔ ان کا کہنا ہے کہ یہ اقدام خطے میں بڑھتی ہوئی کشیدگی کی عکاسی کرتا ہے۔
واضح رہے کہ اصفہان کو بعض رپورٹس میں جوہری تنصیبات کے حوالے سے بھی اہمیت حاصل ہے، تاہم موجودہ حملے کا ہدف زیادہ تر اسلحہ ڈپو اور فوجی انفرا اسٹرکچر بتایا جا رہا ہے۔ تجزیہ کاروں کے مطابق یہ پیش رفت مشرق وسطیٰ میں حالات کو مزید پیچیدہ بناسکتی ہے۔
