لاہور: عالمی وبا کورونا کی دوسری لہر کے پیش نظر سیاسی جلسوں پر پابندی اور دیگر حفاظتی اقدامات کے لیے ہائی کورٹ میں درخواست دائر کرائی گئی ہے۔
جوڈیشل ایکٹوازم پینل کے سربراہ اظہر صدیق ایڈووکیٹ کی جانب سے لاہور ہائی کورٹ میں درخواست دائر کی گئی ہے۔ مفاد عامہ کی درخواست میں کورونا کی دوسری لہر پر گہری تشویش کا اظہار کرتے ہوئے موقف اختیار کیا گیا کہ کورونا کے شدید پھیلاوٴ کی وجہ سے اسپتالوں میں بستر کم پڑنے لگے ہیں، عالمی وائرس سے بچاو کے لیے جلسے جلوسوں اور دیگر اجتماعات پر پابندی لگانا وقت کی ضرورت ہے۔
درخواست میں اپیل کی گئی کہ اسپتالوں میں فارمیسیز کو 24 گھنٹے کھلا رکھا جائے، سینئر پروفیسر کی رات کے اوقات میں کورونا وارڈ میں موجودگی یقینی بنائی جائے، اہل خانہ کو مریض کی حالت کے بارے میں اگاہ کیا جائے اور ویڈیو کالز کی سہولت بھی یقینی بنائی جائے۔
خیال رہے کہ اپوزیشن اتحاد (پی ڈی ایم) نے 13 دسمبر کو لاہور میں جلسے کا اعلان کررکھا ہے جب کہ حکومت کا موقف ہے کہ اپوزیشن کے جلسوں سے کورونا پھیل رہا ہے۔
