کراچی: اداکارہ صبا قمر نے حال ہی میں کراچی میں طویل عرصے تک رہنے کے اپنے تجربات پر کھل کر بات کرتے ہوئے مایوسی ظاہر کی ہے۔
صبا قمر نے مزاحیہ انداز میں کہا، کراچی میں رہنے کا، دو دن کا، ایک ہفتے کا مذاق ٹھیک ہے، لیکن تین ماہ کا مذاق ٹھیک نہیں۔
صبا نے شہر کے موسم اور آلودگی کی طرف اشارہ کرتے ہوئے مزید کہا کہ بال اتر چکے، جلد خراب ہوگئی، میں بھنگن لگ رہی ہوں۔
ان کے اس بیان نے سوشل میڈیا پر تہلکہ مچادیا ہے اور مداحوں کے درمیان کراچی کے موسم، آلودگی اور طرزِ زندگی کے چیلنجز پر بحث چھڑ گئی ہے۔
صبا قمر کے الفاظ نے کراچی کے رہائشیوں کو اپنی بات محسوس کرائی، کیونکہ شہر کی گرمی، نمی اور آلودگی اکثر لوگوں کی صحت اور جلد پر منفی اثرات ڈالتی ہے۔ انہوں نے مزید کہا کہ کراچی کا ماحول ان کی جلد اور بالوں پر بہت بھاری پڑا ہے، اور وہ اس سے تنگ آچکی ہیں۔
صبا نے اپنی بات کو مزاحیہ رنگ دیتے ہوئے کہا کہ جب وہ گھر واپس پہنچیں تو گھر والوں نے انہیں پہچاننے سے انکار کرتے ہوئے کہا کہ بہن تم کون ہو؟
صبا قمر کے اس بیان پر مداحوں نے مختلف آرا دی ہیں۔ کچھ صارفین نے ان کی بات سے اتفاق کرتے ہوئے کہا کہ کراچی کا موسم واقعی مشکل ہے جب کہ کچھ نے ان کے الفاظ کو مبالغہ آرائی قرار دیا۔
ایک صارف نے لکھا، صبا قمر نے بالکل درست کہا ہے، کراچی کا موسم جلد اور بالوں کے لیے بہت نقصان دہ ہے جب کہ دوسرے نے کہا، یہ صرف ایک اداکارہ کا ڈرامہ ہے، کراچی میں لاکھوں لوگ رہتے ہیں اور انہیں کوئی مسئلہ نہیں ہوتا۔
صبا قمر کا یہ بیان نہ صرف کراچی کے ماحولیاتی مسائل کی طرف توجہ دلانے کا باعث بنا، بلکہ ان کی صاف گوئی اور مزاحیہ انداز نے فینز کو ایک بار پھر ان کا مداح بنادیا۔ انہوں نے اپنے تجربات کو بے تکلفی سے شیئر کرکے یہ ثابت کیا کہ وہ نہ صرف بہترین اداکارہ، بلکہ سچی اور کھری شخصیت بھی رکھتی ہیں۔
