وزیراعظم نے بھارتی اقدامات کے بھرپور جواب کیلئے کل قومی سلامتی کمیٹی کا اجلاس بلالیا

اسلام آباد: مقبوضہ جموں و کشمیر کے علاقے پہلگام میں ہونے والے حملے اور 26 سیاحوں کی ہلاکت پر بھارت کی جانب سے کیے گئے اقدامات کے جواب کے لیے وزیراعظم نے قومی سلامتی کمیٹی کا اجلاس طلب کرلیا۔
نائب وزیراعظم اسحاق ڈار نے کہا کہ وزیراعظم نے صبح اجلاس طلب کیا ہے، جس میں بھارت کے آج کے اقدامات کا جواب دیا جائے گا۔
ذرائع کے مطابق اجلاس میں ملکی سلامتی کے معاملات، پہلگام فالس فلیگ آپریشن کے معاملے پر گفتگو ہوگی جب کہ ذرائع کا کہنا ہے کہ اجلاس میں بھارتی جنگی جنون سے نمٹنے کے حوالے سے بھی اقدامات کی منظوری لی جائے گی۔
اسحاق ڈار کے مطابق قومی سلامتی کمیٹی کے اجلاس میں ملکی سلامتی سے متعلق امورکا جائزہ لیا جائے گا جب کہ بھارت کے حالیہ بیان پر پاکستان کا مؤقف طے کیا جائے گا۔
انہوں نے بتایا کہ اجلاس میں اعلیٰ عسکری و سول قیادت شرکت کرے گی۔
واضح رہے کہ بھارت نے پہلگام واقعے اور 26 سیاح کی ہلاکت کا پاکستان پر بے بنیاد الزام عائد کرتے ہوئے مختلف اقدامات کرنے کا فیصلہ کیا ہے۔ جن میں سندھ طاس معاہدہ ختم کرنے کا اعلان، پاکستان میں موجود سفارت کار بھارت طلب، بھارت میں موجود پاکستانیوں کو 48 گھنٹوں میں واپسی کا الٹی میٹم، تمام پاکستانیوں کو جاری کیے گئے ویزا فوری طور پر منسوخ کرنے، واہگہ بارڈر اور
اٹاری چیک پوسٹ بند کرنے کا اعلان شامل ہیں۔