کراچی: آئندہ 2 روز میں سندھ کے مختلف شہروں میں بارش کی پیش گوئی سامنے آئی ہے۔
محکمۂ موسمیات کے مطابق بھارتی گجرات پر موجود ہوا کا واضح کم دباؤ ڈپریشن میں تبدیل ہوگیا، جس کے زیرِ اثر کراچی، حیدرآباد، میرپورخاص، جام شورو، ٹھٹھہ اور سندھ کے دیگر شہروں میں آندھی اور بارش کا امکان ہے۔
محکمۂ موسمیات نے سمندر میں شدید طغیانی کے پیش نظر سندھ کے ماہی گیروں کو 3 اکتوبر تک سمندر میں جانے سے بھی منع کیا ہے۔
محکمۂ موسمیات کے مطابق کراچی میں 24 گھنٹے کے دوران مطلع جزوی ابر آلود اور موسم مرطوب رہنے کا امکان ہے جب کہ شہر میں آج ہلکی بارش اور بوندا باندی کا بھی امکان ہے۔
محکمۂ موسمیات کا بتانا ہے کہ زیادہ سے زیادہ درجہ حرارت 36 ڈگری سینٹی گریڈ رہنے کا امکان ہے۔
