لاہور: کرکٹرز کی موجیں، پاکستان کرکٹ بورڈ نے نئے سینٹرل کنٹریکٹ کا اعلان کردیا، معاوضوں میں ریکارڈ اضافہ۔
پی سی بی کے مطابق تین سال کے کنٹریکٹ کے لیے کامیابی کے ساتھ تمام معاملات طے پاگئے، سینٹرل کنٹریکٹ یکم جولائی 2023 سے 30 جون 2026 تک ہوں گے۔
پی سی بی کی جانب سے جاری بیان کے مطابق 25 کھلاڑیوں کو سینٹرل کنٹریکٹ پیش کیا گیا ہے، معاہدے میں آئی سی سی ریونیو کا حصہ بھی شامل ہے جب کہ ریڈ بال اور وائٹ بال کے کنٹریکٹس کو اکٹھا کردیا گیا ہے، اس کا فیصلہ کنٹریکٹ کمیٹی کی تجویز پر کیا گیا ہے۔
پاکستان کرکٹ بورڈ کے مطابق نئے سینٹرل کنٹریکٹ میں کھلاڑیوں کے معاوضوں میں 127 سے 202 فیصد تک اضافہ کیا گیا ہے۔
سینٹرل کنٹریکٹ کی فہرست کو چار کیٹیگریز میں تقسیم کیا گیا ہے۔ اے کیٹیگری میں 3 کھلاڑی شامل ہیں، جن کے معاوضے میں 202 فیصد اضافہ کیا گیا ہے۔
کیٹگری بی میں 6 کرکٹرز شامل ہیں جن کے معاوضوں میں 144 فیصد اضافہ کیا گیا ہے جب کہ کیٹگری سی میں 2 کرکٹرز شامل ہیں جن کے معاوضوں میں 135 فیصد اضافہ ہوا ہے۔
اس کے علاوہ کیٹگری ڈی میں 14 کرکٹرز شامل ہیں، جن کے معاوضے میں 127 فیصد اضافہ کیا گیا ہے۔
سینٹرل کنٹریکٹ سے ڈراپ ہونے والے کرکٹرز میں اظہر علی، فواد عالم، نعمان علی، عابد علی، یاسر شاہ، آصف علی، حیدر علی، خوشدل شاہ، عثمان قادر اور زاہد محمود شامل ہیں۔
گزشتہ سینٹرل کنٹریکٹ میں ایمرجنگ کیٹگری میں شامل سلمان علی آغا اور محمد حارث کی ترقی ہوئی ہے جب کہ ایمرجنگ کیٹگری کو ختم کردیا گیا ہے۔
پی سی بی کے نئے سینٹرل کنٹریکٹ کی کیٹگری اے میں کپتان بابر اعظم، محمد رضوان اور شاہین آفریدی شامل ہیں۔
سینٹرل کنٹریکٹ کی کیٹگری بی میں فخر زمان، حارث رؤف، امام الحق، محمد نواز، نسیم شاہ اور شاداب خان کو شامل کیا گیا ہے۔
سینٹرل کنٹریکٹ کی کیٹگری سی میں عماد وسیم اور عبداللہ شفیق شامل ہیں۔
اس کیٹگری میں فہیم اشرف، حسن علی، افتخار احمد، احسان اللہ، محمد حارث، وسیم جونیئر، صائم ایوب، سرفراز احمد، سلمان آغا، سعود شکیل، شاہ نواز ڈاہانی، شان مسعود، اسامہ میر اور زمان خان کو رکھا گیا ہے۔
کرکٹ بورڈ کے مطابق ٹیسٹ میچ فیس میں 50 فیصد، ون ڈے میں 25 فیصد اور ٹی ٹوئنٹی میں ساڑھے 12 فیصد اضافہ کیا گیا ہے۔
سینٹرل کنٹریکٹ میں شامل کھلاڑیوں کو دو غیر ملکی لیگز کھیلنے کی اجازت ہوگی، اس کے علاوہ کھلاڑیوں کو ڈومیسٹک کرکٹ کھیلنے پر 50 فیصد انٹرنیشنل میچ فیس ملے گی۔
پی سی بی کے مطابق تین سال کے کنٹریکٹ کے دوران ہر 12 مہینے کے بعد کرکٹرز کی پرفارمنس کا جائزہ لیا جائے گا۔