نیپرا نے ماہانہ ایڈجسٹمنٹ کے تحت بجلی سستی کردی

اسلام آباد: گزشتہ روز وزیراعظم شہباز شریف کے اعلان کے بعد بجلی کی قیمتوں میں کمی شروع ہوگئی، نیشنل الیکٹرک پاور ریگولیٹری اتھارٹی (نیپرا) نے کراچی سمیت ملک بھر کے لیے سہ ماہی اور ماہانہ ایڈجسٹمنٹ کے تحت بجلی سستی کردی۔
نیپرا نوٹیفکیشن کے مطابق سہ ماہی ایڈجسٹمنٹ کے تحت فی یونٹ بجلی 1 روپے 90 پیسے سستی کردی گئی۔
نیپرا کے مطابق جنوری کی فیول پرائس ایڈجسٹمنٹ کے تحت کراچی کے لیے فی یونٹ بجلی مزید 3 روپے 2 پیسے سستی اور کراچی کے سوا ڈسکوز صارفین کے لیے فروری کی فیول پرائس ایڈجسٹمنٹ کے تحت فی یونٹ بجلی 46 پیسے سستی کر دی گئی۔
نیپرا کا کہنا ہے کہ اپریل، مئی اور جون کے بجلی بلوں میں ہر ماہ صارفین کو ایک روپے 90 پیسے کا یہ ریلیف منتقل کیا جائے گا، مجموعی طور پر اس سے بجلی صارفین کو 56 ارب 38 کروڑ روپے کا ریلیف ملے گا۔
نیپرا کے مطابق یہ ریلیف صارفین کو اپریل کے بجلی بلوں میں منتقل کیا جائے گا۔
یاد رہے کہ جمعرات کو وزیراعظم شہباز شریف نے گھریلو اور صنعتی صارفین کے لیے بجلی کی قیمتوں میں بڑی کمی کا اعلان کیا تھا۔
سرکاری دستاویز کے مطابق بجلی کی فی یونٹ اوسط قیمت میں 7.41 روپے کمی کی گئی ہے۔
گھریلو صارفین کے لیے بجلی کی فی یونٹ قیمت میں 7.15 روپے کمی کی گئی ہے۔ بجلی کی فی یونٹ اوسط قیمت 45.05 روپے سے کم کرکے 37.64 روپے کردی گئی ہے۔
دستاویز کے مطابق کمرشل صارفین کے لیے بجلی کی فی یونٹ قیمت میں 8.58 روپے کمی کی گئی ہے، جس کے بعد فی یونٹ بجلی71.06 روپے سے62.47 روپے ہوگئی ہے۔