کٹھمنڈو: دُنیا کے سب سے اونچے پہاڑ ماؤنٹ ایورسٹ پر نیپال نے کوہ پیمائی فیس میں اضافہ کردیا، موسم بہار کی فیس 11 ہزار ڈالر سے بڑھاکر 15 ہزار ڈالر مقرر کردی گئی۔
خبر رساں ادارے کے مطابق نیپال کے محکمہ سیاحت نے ماؤنٹ ایورسٹ پر کوہ پیمائی کے پرمٹ کی فیس میں یہ کہہ کر ایک تہائی اضافہ کردیا ہے کہ اس سے آلودگی کا مسئلہ حل کرنے میں مدد ملے گی۔
محکمہ سیاحت کے ڈائریکٹر نریان پرساد نے کہا کہ یہ فیس ایک دہائی تک نہیں بڑھائی گئی اور اب وقت ہے کہ اس میں اضافہ کیا جائے۔
نیپال میں دنیا کی 8 ہزار میٹر سے بلند 14چوٹیوں میں سے 8 موجود ہیں اور یہاں ہر سال ہزاروں کوہ پیما آتے ہیں۔
غیر ملکی کوہ پیما ماؤنٹ ایورسٹ کو سر کرنے کے لیے ہزاروں ڈالر خرچ کرتے ہیں اور اس مد میں گزشتہ برس حکومت کے خزانے میں 40 لاکھ ڈالر جمع ہوئے۔ یہ رقم پہاڑ کی صفائی اور ریسکیو آپریشنز میں خرچ کی جاتی ہے۔
