نئی دہلی: معروف بھارتی صنعت کار اور ریلائنس انڈسٹریز کے مالک مکیش امبانی ملک کی امیر ترین شخصیت کا اعزاز کھو بیٹھے۔
بھارتی میڈیا رپورٹ کے مطابق مکیش امبانی کی دولت میں گزشتہ 8 ماہ کے دوران 25 فیصد کمی ہوئی، جس کے بعد اُن کے اثاثوں کی مالیت 10.14 لاکھ کروڑ بھارتی روپے تک پہنچ گئی ہے۔
امبانی کی دولت میں جہاں 25 فیصد کمی ہوئی، وہیں بھارت کے مقامی صنعت کار اور اڈانی گروپ کے سربراہ گوتم اڈانی کے اثاثوں میں 95 فیصد اضافہ ریکارڈ کیا گیا ہے، جس کے بعد وہ بھارت کے امیر ترین شخص بن گئے۔
بھارت کے معروف تحقیقی اور سرمایہ کاری گروپ کی جانب سے جاری کردہ معلومات کے مطابق اڈانی کے اثاثوں کی مالیت اب 11.16 لاکھ کروڑ روپے تک پہنچ گئی ہے جس کے ساتھ وہ بھارت کے امیر ترین شخص بن گئے۔
بھارت کے تحقیقی و سرمایہ کاری گروپ ہوُروُن کے مطابق فہرست میں تیسرے نمبر پر موجود ایچ سی ایل ٹیکنالوجیز کے مالک شیو نادر کی دولت ایک فیصد اضافے کے بعد 3.14 لاکھ کروڑ ہے جب کہ سیرم انسٹی ٹیوٹ آف انڈیا کے مالک سائرس ایس پونا والا چوتھے نمبر پر رہے۔
