اسلام آباد: الیکشن کمیشن آف پاکستان نے دارالحکومت اسلام آباد میں بلدیاتی انتخابات ملتوی کردیے۔
اسلام آباد ہائی کورٹ کے چیف جسٹس، جسٹس اطہر من اللہ کی سربراہی میں بلدیاتی انتخابات سے متعلق (ن) لیگ اور پی ٹی آئی کی درخواستوں پر سماعت ہوئی، اس سلسلے میں الیکشن کمیشن حکام عدالت میں پیش ہوئے۔
چیف جسٹس نے سماعت کے آغاز پر الیکشن کمیشن حکام سے استفسار کیا کہ الیکشن کمیشن نے کیا فیصلہ کیا ہے؟ اس پر کمیشن کے حکام نے بتایا کہ وفاقی دارالحکومت میں بلدیاتی انتخابات ملتوی کردیے گئے ہیں، الیکشن کمیشن نے بلدیاتی انتخابات پر حکومتی نوٹیفکیشن کے تحت وضاحتی مؤقف دیا ہے۔
جسٹس اطہر من اللہ نے سوال کیا کہ یہ بتائیں کتنے دنوں میں الیکشن ہوگا؟ اس پر الیکشن کمیشن حکام نے کہا کہ 60 سے 65 دنوں میں الیکشن کرائے جاسکتے ہیں۔
چیف جسٹس نے کمیشن کے حکام کو ہدایت کی کہ ووٹ کو ایک وارڈ سے دوسرے وارڈ میں منتقل نہ کیا جائے۔
اس پر الیکشن کمیشن حکام نے عدالت کو بتایا کہ پہلے نئی حلقہ بندیاں کریں گے پھر بلدیاتی انتخابات کا شیڈول دیں گے، 60 روز میں نئی حلقہ بندیاں کرکے الیکشن شیڈول کا اعلان کریں گے، عدالت وفاقی حکومت کو بلدیاتی انتخابات کے لیے تعاون کا حکم دے کیونکہ حکومتیں بلدیاتی انتخابات میں رکاوٹیں ڈالتی ہیں اس لیے عدالت وفاقی حکومت کوبلدیاتی انتخابات کی آئینی ذمے داری پوری کرنے کا حکم دے۔
بعدازاں اسلام آباد ہائی کورٹ نے الیکشن کمیشن کو 65 روز میں نئی حلقہ بندیاں کرکے الیکشن شیڈول کے اعلان کا حکم دیتے ہوئے سماعت ملتوی کردی۔
