کراچی: ٹیسٹ سیریز کے تیسرے مقابلے کے تیسرے روز کے اختتام پر میزبان پاکستان کے 167 رنز کے ہدف کے جواب میں مہمان انگلینڈ نے 2 وکٹ پر 112 رنز بنالیے اور اسے پاکستان کے خلاف سرزمین پاک پر پہلی بار کلین سوئپ کرنے کے لیے مزید 55 رنز کی ضرورت ہے۔
کراچی کے نیشنل اسٹیڈیم میں کھیلے جارہے میچ کے تیسرے روز پاکستان نے اپنی دوسری نامکمل اننگز کا آغاز 21 رنز بغیر کسی نقصان سے کیا تو شان مسعود 3 اور عبداللہ شفیق 14 رنز کے ساتھ وکٹ پر موجود تھے اور پاکستان کو انگلینڈ کی پہلی اننگز کی برتری ختم کرنے کیلئے مزید 29 رنز درکار تھے۔
پاکستان کا اسکور 53 رنز پر پہنچا تو پہلے شان مسعود ریورس سوئپ کھیلنے کی کوشش میں لیچ کی گیند پر بولڈ ہوگئے اور پھر اپنا آخری ٹیسٹ کھیلنے والے اظہر علی بھی دوسری ہی گیند پر بولڈ ہوگئے۔ عبداللہ شفیق بھی 26 رنز بناکر لیچ ہی کی گیند پر ایل بی ڈبلیو ہوئے۔
کپتان بابر اعظم 54 اور سعود شکیل 53 رنز بناکر آؤٹ ہوئے جب کہ فہیم اشرف صرف ایک رن بنا کر جو روٹ کی گیند پر آؤٹ ہوئے، نعمان علی 15 رنز بنا کر مارک ووڈ کی گیند پر ایل بھی ڈبلیو ہوئے، محمد وسیم جونیئر 2 رنز بنا کر ریحان احمد کی گیند پر کیچ آؤٹ ہوئے پھر آغا سلمان بھی 21 رنز بناکر ریحان کی گیند پر چلتے بنے اور پوری پاکستانی ٹیم اپنی دوسری اننگز میں 216 رنز بنا کر آؤٹ ہوگئی۔
انگلینڈ کی جانب سے جیک لیچ نے 3، جوروٹ اور مارک ووڈ نے ایک ایک وکٹ حاصل کی جب کہ لیگ اسپنر ریحان احمد نے میچ میں 7 وکٹیں حاصل کیں۔
167 رنز کے ہدف کے تعاقب میں انگلش بیٹرز نے ٹیسٹ کو ٹی ٹوئنٹی بنالیا اور تیز رفتار بیٹنگ کرتے ہوئے آج ہی میچ ختم کرنے کی کوشش کی، تاہم خراب روشنی آڑے آگئی جس کے باعث میچ روک دیا گیا۔
تیسرے روز کھیل کے اختتام پر انگلینڈ نے 2 وکٹ پر 112 رنزبنالیے ہیں اور اسے پاکستان کے خلاف سرزمین پاک پر پہلی بار کلین سوئپ کرنے کے لیے مزید 55 رنز درکار ہیں اور اس کی 8 وکٹیں باقی ہیں۔
خیال رہے کہ کراچی ٹیسٹ کی پہلی اننگز میں پاکستانی ٹیم 304 رنز بنا کر آؤٹ ہوئی تھی، جواب میں انگلینڈ کی ٹیم نے 354 رنز بنائے تھے اور پاکستان کے خلاف پہلی اننگز میں 50 رنز کی برتری حاصل کی تھی۔
تین ٹیسٹ میچوں کی سیریز میں انگلینڈ کو دو صفر کی فیصلہ کن سبقت حاصل ہے۔
