کراچی: شہر قائد کے علاقے جمشید کوارٹر میں لسبیلہ چوک کے قریب سیوریج لائن کے دھماکے سے 8 افراد زخمی ہوگئے جب کہ اس دھماکے کے باعث متعدد دکانیں تباہ ہوگئیں۔
پولیس کے مطابق لسبیلہ چوک کے قریب نعمان مسجد کے سامنے زیر زمین سیوریج لائن میں نماز جمعہ کے بعد زوردار دھماکا ہوا۔
دھماکے کے نتیجے میں لگ بھگ 100 گز تک کی دکانیں اور ایک پکوان ہاؤس کو شدید نقصان پہنچا جب کہ 8 افراد زخمی ہوگئے۔
ایدھی فاؤنڈیشن کے مطابق اس واقعے کے 8 زخمیوں کو اسپتال منتقل کردیا گیا ہے۔
