گانسو: چین کے صحرا میں ٹریفک لائٹ کا ہونا ناقابل یقین بلکہ مضحکہ خیز بات لگتی ہے، تاہم چین ایسا نہیں سوچتا۔ اس کے ایک ریگستان میں باقاعدہ ٹریفک سگنلز کی تنصیب کردی گئی ہے۔
چین کے کمتاگ (Kumtag) صحرا میں اونٹوں کی سواری مقبول تفریح ہے، جس کے لیے مقامی حکام ٹریفک جام سے بچنے کے لیے ٹریفک سگنلز کا استعمال کرتے ہیں۔
یہ ٹریفک سگنلز آپ کو منگشا ماؤنٹین کے ریت کے ٹیلوں اور گانسو صوبے کے کریسنٹ لیک نیچر پارک میں جگہ جگہ نظر آئیں گے۔
مئی کے آغاز میں سالانہ تعطیلات کے دوران ہزاروں لوگ ان قدرتی سیاحتی مقامات پر آتے ہیں اور مختلف سرگرمیوں میں مشغول ہوتے ہیں، جن میں سب سے زیادہ مقبول اونٹوں کی سواری ہے۔
2023 میں منگشا ماؤنٹین اور کریسنٹ نیچر پارک میں سواری کے لیے قریباً 2,400 اونٹ موجود تھے اور ساتھ ہی دسیوں ہزار سیاح کی یومیہ تعداد دیکھنے میں آئی، جس کے نتیجے میں اونٹوں اور لوگوں کی بھیڑ سے کافی مسئلے مسائل پیدا ہوئے۔
یہی وجہ ہے کہ اس مسئلے کو حل کرنے کے لیے مقامی حکام نے خطے میں اونٹوں کے ٹریفک سگنلز استعمال کرنے کا فیصلہ کیا۔