کراچی: شہر قائد میں دن کے اوقات میں ہیوی ٹریفک پر مکمل پابندی عائد کردی گئی۔
کمشنر کراچی نے دن کے اوقات میں شہر میں ہیوی ٹریفک کے داخلے پر دفعہ 144 نافذ کردی ہے۔
کمشنر کراچی کی جانب سے جاری نوٹیفکیشن کے مطابق کراچی ڈویژن میں پابندی 2 ماہ کے لیے عائد کی گئی ہے، جس کا اطلاق 17 اپریل سے 16 جون تک ہوگا۔ پابندی کا اطلاق تعمیراتی مال بردار ڈمپرز پر بھی ہوگا۔
نوٹیفکیشن کے مطابق ہیوی ٹریفک کو صبح 6 سے رات 10 بجے تک شہر میں داخلےکی اجازت نہیں ہوگی۔
ہیوی ٹریفک کے داخلے پرپابندی ڈی آئی جی ٹریفک کی سفارش پر لگائی گئی ہے۔
نوٹیفکیشن کے مطابق ہیوی ٹریفک کو سپرہائی وے سے نیو کراچی انڈسٹریل ایریا براستہ سلپ روڈ چلنے کی اجازت ہوگی۔ نیشنل ہائی وے سے گودام چورنگی براستہ منظر پٹرول پمپ، یونس چورنگی اور داؤد چورنگی سے جام صادق چلنے کی اجازت ہوگی۔ ناردرن بائی پاس سے پراچہ چوک، اسٹیٹ ایونیو، سیمنز چورنگی سے گلبائی ماڑی پور روڈ پر ہیوی ٹریفک کو آمدورفت کی اجازت ہوگی۔
