کراچی: شہر قائد کے مختلف علاقوں میں تیز ہواؤں کے ساتھ بارش سے موسم سرد ہوگیا، بارش کا سلسلہ رات تک وقفے وقفے سے جاری رہنے کا امکان ہے۔
صائمہ عربین ولاز، سرجانی، البیلا، لسبیلہ، گارڈن ایسٹ، شو مارکیٹ، رام سوامی اور سوک سیںٹر گلشن اقبال میں بارش سے موسم سرد ہوگیا۔
شہر میں چلنے والی تیز ہوائیں یخ بستہ ہواؤں میں تبدیل ہوگئیں، مضافاتی علاقوں سمیت کچھ میں گرد آلود ہوائیں چل پڑیں۔
محکمۂ موسمیات نے آج دوپہر سے شام کے درمیان گرج چمک کے ساتھ درمیانی و ہلکی بارش جب کہ آندھی چلنے کی بھی پیش گوئی کی تھی۔
شہر میں مغربی ہواؤں کے نئے سلسلے کے اثرات نمودار ہونا شروع ہوگئے، ہواؤں کی رفتار بتدریج بڑھ رہی ہے جب کہ ہوا کی رفتار 40 کلومیٹر فی گھنٹہ ریکارڈ ہورہی ہے، دن بھر چلنے والی ہواؤں کی رفتار 50 سے 55 کلومیٹر تک تجاوز کرسکتی ہے۔
محکمۂ موسمیات کے مطابق بارش کا سلسلہ آج صرف جمعرات تک برقرار رہ سکتا ہے۔
محکمۂ موسمیات کے مطابق آئندہ 3 گھنٹوں کے دوران سندھ میں بارش کا امکان ہے، بارش برسانے والا سسٹم مغربی سندھ کے علاقوں کی جانب بڑھ رہا ہے۔ دادو، قمبر شہداد کوٹ، لاڑکانہ، جام شورو، حیدرآباد اور گردونواح میں بارش متوقع ہے۔
کراچی میں سردی کی شدت چند روز تک برقرار رہنے کا امکان ہے جب کہ کل بلوچستان کی سرد ہوائیں چلنے کے باعث کم سے کم درجہ حرارت 7 سے 9 ڈگری سینٹی گریڈ رہنے کا امکان ہے۔
آئندہ 24 گھنٹوں کے دوران موسم سرد اور خُشک رہنے کا امکان ہے، آج صبح ہلکی دُھند کے باعث حدِ نگاہ 2 کلومیٹر اور نمی کا تناسب 84 فیصد ریکارڈ کیا گیا۔ آج کم سے کم درجہ حرارت 13.5 ڈگری سینٹی گریڈ ریکارڈ ہوا۔
گزشتہ روز زیادہ سے زیادہ درجہ حرارت 27.1 ڈگری سینٹی گریڈ ریکارڈ ہوا اور آج زیادہ سے زیادہ درجہ حرارت 21 سے 23 ڈگری سینٹی گریڈ رہنے کی توقع ہے۔
