باہر کے کھانے کھانے کے شوقین افراد لاک ڈاؤن کے دنوں میں سخت مشکل کا شکار ہیں، ایسے افراد کو اگر دکانیں کھلی ہوئی مل بھی جائیں تو وہ حفظان صحت کے اصولوں کا سوچتے ہوئے باہر کا کھانا کھانے سے گریز ہی کرتے ہیں۔
تاہم ایسے افراد کے لیے خوشخبری ہے کہ بہت جلد اب گول گپے وینڈنگ مشین سے دستیاب ہوں گے۔
بھارتی ریاست گجرات میں بھرت پرجپتی نامی ایک شخص نے وینڈنگ مشین کی طرز پر ایسی مشین بنائی ہے جو گول گپے فراہم کرسکتی ہے۔
اس مشین کا طریقہ استعمال بھی وینڈنگ مشین کی طرح ہے، پیسے ڈالو، اپنی پسند کے گول گپے کا بٹن دباؤ اور تھوڑی دیر میں گول گپے ہاتھ میں ہوں گے۔
اس مشین کی بدولت صاف ستھرے گول گپے کھائے جاسکتے ہیں جن کی تیاری میں کوئی انسانی عمل دخل نہیں ہوگا۔
اس مشین کو تیار کرنے والے بھرت پیشے کے لحاظ سے موبائل ٹیکنیشن ہیں، بھرت کا کہنا ہے کہ وہ بہت چھوٹی عمر سے اس طرح کی مشینوں کے ساتھ کام کر رہے ہیں۔
بھرت کے مطابق انہوں نے یہ مشین 40 ہزار بھارتی روپے کی لاگت سے 6 ماہ میں تیار کی ہے۔ یہ مشین بجلی سے چلتی ہے تاہم اس میں 24 وولٹ کی بیٹری بھی ہے جو ایک بار چارج کرنے پر 6 گھنٹے تک کام کرسکتی ہے۔
بھرت کا کہنا ہے کہ انہوں نے اس مشین کو مختلف الیکٹرانک ویسٹ سے بنایا ہے۔
کیا آپ اس مشین کے بنے گول گپے کھانا چاہیں گے؟