نئی دہلی: بھارتی ایئرلائن انڈیگو کی سیکڑوں پروازیں معطل ہونے کی وجہ سے نئے شادی شدہ جوڑے کے ریسیپشن کی تقریب منفرد اور غیر معمولی صورت اختیار کرگئی۔
بھارتی میڈیا رپورٹس کے مطابق بھارتی جوڑے کپل اور نیکیتا کی شادی کی تقریب دہلی میں طے تھی۔ تاہم، بدقسمتی سے ان کی دہلی جانے والی انڈیگو کی پرواز اچانک منسوخ ہوگئی۔
اس پر جوڑے نے اپنی شادی کی تقریب میں طبعی طور پر شامل نہ ہوپانے پر ایک منفرد انداز اپنایا اور آن لائن ریسیپشن کا انعقاد کرنے کا فیصلہ کیا۔
ٹیک کے شعبے سے تعلق رکھنے والے کپل اور نیکیتا نے اس غیر متوقع صورت حال میں جدید ٹیکنالوجی سے استفادہ کیا اور اپنے دوستوں و خاندان کے افراد کو ویڈیو کال کے ذریعے شادی کی خوشیوں میں شریک کیا۔
ان کے لیے یہ ایک نئی نوعیت کا تجربہ تھا، کیونکہ وہ اپنی ہی شادی کی تقریب میں غیر موجودگی کے باوجود اپنے اہل خانہ اور دوستوں کے ساتھ خوشیاں بانٹ رہے تھے۔
یہ واقعہ اس بات کی عکاسی کرتا ہے کہ کس طرح جدید ٹیکنالوجی نامساعد حالات میں بھی لوگوں کے درمیان خوشیاں بانٹنے کے نئے راستے کھول دیتی ہے۔
