کراچی: محکمۂ موسمیات نے کراچی میں موسم سرما کی پہلی بارش کی پیش گوئی کردی۔
محکمۂ موسمیات کے مطابق 28 دسمبر سے مغربی ہواؤں کا سلسلہ بالائی علاقوں کو متاثر کرے گا، منگل سے بدھ کے درمیان مغربی ہواؤں کا سسٹم اثرانداز ہوسکتا ہے۔
کراچی میں 30 دسمبر کو موسم سرما کی پہلی بارش کا امکان ہے، جس کے باعث سردی کی شدت میں اضافہ ہوسکتا ہے۔
شہر کے درجہ حرارت کے حوالے سے بتایا گیا ہے کہ 24 گھنٹوں کے دوران کم سے کم درجہ حرارت 11 ڈگری ریکارڈ کیا گیا جب کہ آئندہ 24 گھنٹوں کے دوران دن میں موسم خشک، رات میں خنک رہنے کا امکان ہے۔
محکمۂ موسمیات کے مطابق آج زیادہ سے زیادہ درجہ حرارت 26 سے 28 ڈگری تک رہنے کا امکان ہے، ہوا میں نمی کا تناسب 66 فیصد ہے اور شمال مشرق سے ہلکی رفتار سے ہوائیں چل رہی ہیں۔
اس کے علاوہ بالائی علاقوں میں شدید سردی کی لہر جاری ہے، سب سے کم درجہ حرارت استور میں منفی 14، اڑنگ کیل میں منفی 7، گلگت اور چترال میں منفی 4، کوئٹہ منفی 3، اسلام آباد اور لاہور میں 7 ڈگری جب کہ پشاور میں کم سے کم درجہ حرارت 8 ڈگری سینٹی گریڈ ریکارڈ کیا گیا۔
