کراچی: معروف اداکار، گلوکار اور میزبان فخر عالم کے گھر چوری کی واردات ہوئی ہے۔
سماجی رابطے کی ویب سائٹ ایکس پر پوسٹ شیئر کرتے ہوئے فخر عالم نے مایوسی کا اظہار کرتے ہوئے اطلاع دی کہ چور ان کے گھر کا صفایا کرگئے ہیں۔
فخر عالم نے اپنے پیغام میں لکھا کہ ان کے کراچی میں موجود گھر کو لوٹ لیا گیا ہے جب کہ پولیس جائے وقوع پر موجود اور واقعے کی تحقیقات کررہی ہے۔
پولیس کے مطابق فخرعالم کے گھر پر تعینات معمر چوکیدار کو کسی نامعلوم شخص نے آگر نشہ آور کھانا دیا اور کھانا کھانے کے بعد معمر چوکیدار بے ہوش ہوگیا، جس کے بعد 3 سے 4 ملزمان گھر میں داخل ہوئے، ملزمان نے کمروں میں موجود الماریوں اور دیگر سامان کی تلاشی لی۔
ملزمان نے فخر عالم کے گھر میں موجود تجوری کو بھی توڑنے کی کوشش کی، پولیس نے سی سی ٹی وی فوٹیج حاصل کرنے کے بعد چوری کی واردات میں ملوث ملزمان کی تلاش شروع کردی ہے۔
فخر عالم کا کہنا تھا کہ ان کے لیے چیزیں اہم نہیں لیکن ذہنی سکون بے حد ضروری ہے اور اس کی کوئی قیمت نہیں ہوتی، انہیں نے اس صورت حال پر پریشانی کا اظہار کرتے ہوئے کہا کہ انہیں اُمید ہے کہ چور کو جلد گرفتار کرلیا جائے گا۔
انہوں نے لوگوں کو چوکنا رہنے کی ہدایت کی اور کہا کہ ان کا اصل نقصان ذہنی سکون کا کھونا ہے کیونکہ یہ سب ان کے لیے پریشان کن ہے۔
فخر عالم کے مداحوں کی جانب سے ان کے گھر میں چوری کی واردات پر افسوس کا اظہار کرتے ہوئے شدید مذمت اور ملزم کو پکڑنے کا مطالبہ کیا جارہا ہے۔
