کراچی: عیدالاضحیٰ پر شہریوں کی بڑی تعداد نے قربانی سے متعلق نئے اوزار خریدے اور پرانے اوزار پر پر دھاریں لگوالیں۔
اس حوالے سے قربانی کے اوزار کو تیز کرنے اور فروخت کی دکانوں پر رش رہا۔ الکرم اسکوائر میں قربانی کے اوزار فروخت اور تیز کرنے کی دکان کے مالک محسن علی نے بتایا کہ عیدالاضحیٰ پر جانوروں کی قربانی میں بغدے، مختلف اقسام کی چھریاں اور ان کو دھار لگانے کے لیے خصوصی سیخ استعمال ہوتی ہے۔
قصابوں کے لیے یہ اوزار آرڈر پر بنائے جاتے ہیں۔ گھریلو استعمال کے نئے اوزار کی قیمتوں میں 100 سے 400 روپے تک اضافہ ہوا ہے۔ مختلف اقسام کی چھریاں 400 روپے سے 2500 روپے یا اس سے زائد میں فروخت کی جارہی ہیں۔
بغدے کی قیمت 800 سے 3000 روپے تک رہی۔ زیادہ تر شہریوں نے پرانے اوزار کو تیز کرایا ہے۔ ان اوزار کو تیز کرنے کیلئے فی کس دھار ریٹ 150 سے 200 روپے تک وصول کیا جارہا ہے۔
کئی شہریوں نے 3 ہزار مالیت تک کے قربانی کا گوشت بنانے کے اوزار خریدے ہیں جب کہ پرانے اوزار پر دھاریں پہلے ہی لگوالی ہیں۔
