کراچی: اسٹار آل رائونڈر شاہد خان آفریدی کی بڑی بیٹی اقصیٰ کی رخصتی کی تقریب جمعے کی شب کراچی میں ہوئی، جس کی تصاویر شاہد آفریدی نے ٹوئٹر پر جاری کی ہیں۔
شاہد آفریدی کی بڑی بیٹی اقصیٰ آفریدی کی شادی کی تقریب کراچی کے مقامی ہال میں منعقد ہوئی، جس میں مہندی بھی ہوئی جس کے بعد اقصیٰ کی رخصتی ہوگئی۔
اقصیٰ آفریدی کی رخصتی میں بابر اعظم، محمد رضوان، امام الحق، شان مسعود، سرفراز احمد، حسن علی، عامر جمال اور اعظم خان شریک ہوئے۔
اس کے علاوہ سابق کرکٹرز معین خان، ارشد خان، محمد اکرم اور وقار یونس بھی شریک ہوئے۔
اقصیٰ اور نصیر کا نکاح گزشتہ برس دسمبر میں ہوا تھا جب کہ دوسری بیٹی انشا اور شاہین آفریدی کا بھی نکاح ہوچکا اور ان کی رخصتی کی تقریب رواں برس ہوگی۔
ٹوئٹر پر بیٹی کی رخصتی کے لمحات کی تصاویر شیئر کرتے ہوئے شاہد آفریدی نے لکھا میری پیاری بیٹی، ابھی بھی کل کی طرح لگتا ہے، جب میں نے تمہیں اپنی بانہوں میں پالا، اُس دن میں نے خود سے وعدہ کیا تھا کہ تمہارا ساتھ کبھی نہیں چھوڑوں گا۔اگرچہ آپ اپنی زندگی میں ایک نیا باب شروع کرنے جارہی ہیں، لیکن آپ ہمیشہ میرے دل میں رہیں گے کیونکہ میں وہ آدمی ہوں جس نے آپ سے سب سے پہلے پیار کیا۔
شاہد خان آفریدی نے بیٹی اور داماد کے لیے پیغام میں کہا، اللہ آپ دونوں کو اپنی حفاظت میں رکھے اور آپ کو ایک ساتھ ایک خوبصورت زندگی گزارنے کا موقع عطا فرمائے۔ آمین۔
